تبادل لینک هوشمند
دونن آخشام چاغي سن‌سيز مني آغلاتدي ياغيش
ياديما سالدي سني مطلبينه چاتدي ياغيش
کوچه لر اولدو گؤزومده يئنه بير آرپا چايي
مني سن‌سيز نئجه نيسگيل سئلينه آتدي ياغيش
اودو سؤندورمه گه سو قايداسي دير آمما دونن
کؤزه ره ن کؤنلومو ياغديقجا آلوولاتدي ياغيش
يادا سالدي اؤ ياغيشليق گونو كي اوندا مني
كَپنَك تك باشينا شوقيله اويناتدي ياغيش
دامجي دامجي سنه لاي لاي دئدي قوينومدا منيم
نه دئيم بلکه سني کورپه يه اوخشاتدي ياغيش
بوخاغيندان آخاراق بيلدي شيرينليك شانيسان
گول اوزوندن سوزولوب بال فَرَه سين داتدي ياغيش
دوداقين قيرميزي گوللر كيمي آچميشدي سنين
سوزولن واخت او دوداقلاردا قانا باتدي ياغيش
او قدر مستيديم هئچ بيلمديم آخير نه زامان
سينه م اوسته ساريلان تئل‌لري ايسلاتدي ياغيش
سورا بيلديم آپاريب قورد کئچينين شنگولوسون
سني مندن آليب آنجاق مني آلداتدي ياغيش
دونن آخشام گئنه بير سودا دا گوردوم كي منه
آجيليقلا او شيرين خاطيره ني ساتدي ياغيش
اويانيرديم كي باشيم دَيدي ملامت داشينا
مني رؤيادان آيتماقدا اؤزي ياتدي ياغيش
نظرات شما عزیزان:
خبرنامه وب سایت: